كشفت الإعلامية رضوي الشربيني في حلقة الخميس 31 أغسطس، من برنامجها "هي وبس"، الذي يعرض علي قناة "cbc سفرة"، عن السبب وراء طلاق النجم أحمد سعد وزوجته علياء بسيوني.

وحكت رضوى الشربيني عن طبيعة العلاقة التي تجمعها بالمطرب أحمد سعد وعلياء بسيوني، قائلة: "هناك علاقة صداقة قوية تجمعني بعلياء البسيوني منذ ٧ سنوات، بالإضافة للفنان أحمد سعد الذى تجمعني به علاقة جيدة، وكنت شاهد عيان على زواجهما، وعاصرت معهما مشكلات كثيرة، وكانت علياء تستشيرني فى العديد من الأمور وكيفية حلها، والكثير من الجمهور أطلقوا عليها لقب (وش السعد)، خاصة لانطلاقته الفنية".

وأضافت رضوى الشربيني: عاصرت مع أحمد وعلياء مشاكل كتير وهي كانت بتاخد رأيي كصديقة وكنت بنصحها وأقول لها إديه فرصة تانية وكنت ساعات بكلمه، والحقيقة مكنتش ناوية أتكلم عن الموضوع وكل الناس اتكلمت وناس كتير اتكلمت وقالت وش السعد وإنه اتغير بسببها ووسائل التواصل الاجتماعي بيتكلموا طول الوقت، ولكن اللي خلاني أتكلم التعليق على كلام علياء والناس اللي بتقول عيب وميصحش كان جوزك وأبو بناتك عيب.

وأردفت كاشفة سبب الطلاق الحقيقي بحسب حديث علياء معها قائلة: علياء بتقول مش لطيف اللي أنا عملته ولكن أنا عملت كده من حتة أم محروقة على بنتها وكنت متخيلة لما ينزل من السعودية هيعدي على بنته اللي عملت حادثة مع أمي وإحنا في السعودية قبل ما يروح حفله في الساحل، لإن الدكاترة قالوا إنها لازم تعمل عملية علشان تعرف تمشي على رجليها بعد كده ومتمشيش تعرج، وفوجئت إنه بيقول هنحطها في الجبس وأنا مش متأكدة إن ده هيبقى شيء كويس ليها في المستقبل.

واستكملت رضوى حديث علياء: رد فعلي مكانش كويس معاه لقيته بيقول لي عاوز أطلقك ومتخيلتش الطلاق هيحدث وجاب المأذون وطلقني، وآه غلط إني عملت كده على السوشيال وإني اتكلمت على أبو بناتي والراجل اللي كنت متجوزاه لكن حطوا نفسكم مكاني، أمي عملت حادثة مع بنتي والعربية اترمت من كتر إن الحادثة كبيرة وبنتي اللي عندها 40 يوم ممنوعة من الحركة ومستنية أبوها يشوفها، ولكن نزل من السعودية على الساحل علشان حفلة، وأنا كنت بترجاه ويمكن تجاوزت في طريقة الكلام ولكني فوجئت إنه عاوز يطلق.

واختتمت رضوى الشربيني حديثها قائلة: علياء يمكن تكون غلطت في طريقة التعبير عن غضبها على وسائل التواصل، ولكن يا ريت نحط نفسنا مكانها، أنتي كنتي مستنية جوزك يكون داعم ليكي زي ما أنتي كنتي داعم ليه خاصة في مرض بنتك، يا ريت نرحمها كأم لإنها بجد طلع عينها وأتمنى يرجعوا لبعض.